एसईई नतिजा 15 दिनमै निकाल्न प्रधानमन्त्रीको अडान र रणनीति यस्तो छ

 

प्रधानमन्त्रीले एसईई नतिजा १५ दिनभित्रै सार्वजनिक गर्न निर्देशन दिएपछि राष्ट्रिय परीक्षा बोर्डमा दबाब बढेको छ। मन्त्रालयले कम्तीमा दुई महिना लाग्ने बताए पनि प्रधानमन्त्रीले छिटो परिणाम निकाल्ने योजना ल्याउन आग्रह गरेका छन्। यसपछि नतिजा छिटो निकाल्ने तयारी सुरु भए पनि औपचारिक निर्णय भने हुन बाँकी छ।

माध्यमिक शिक्षा परीक्षा (एसईई) प्रणालीमा व्यापक सुधार ल्याउने तयारीस्वरूप परीक्षा भएकै दिन उत्तरपुस्तिका परीक्षण गर्ने व्यवस्था प्रस्ताव गरिएको छ। नयाँ कार्यविधिअनुसार परीक्षा केन्द्रमै उत्तरपुस्तिका जाँच गरिने योजना अघि बढाइएको हो।

स्रोतका अनुसार केन्द्राध्यक्ष, सुरक्षाकर्मी तथा सीसीटिभी निगरानीमा उत्तरपुस्तिका परीक्षण गरिनेछ। यसले मूल्यांकन प्रक्रियालाई पारदर्शी बनाउनुका साथै नतिजा प्रकाशनमा हुने ढिलाइ कम गर्ने अपेक्षा गरिएको छ।

एसईईमा ठूलो सुधारः परीक्षा केन्द्रमै उत्तरपुस्तिका जाँच, सीसीटिभी निगरानीमा मूल्यांकन

प्रस्तावित व्यवस्थाअनुसार उत्तरपुस्तिका जाँच भएपछि सोही दिन प्राप्ताङ्कसहित कपीहरू सिलबन्दी गरेर सम्बन्धित जिल्लाको शिक्षा विकास तथा समन्वय इकाईमा पठाइनेछ। यसरी परीक्षा सम्पन्न भएको दिनदेखि नै नतिजा प्रक्रियालाई तीव्र बनाउने लक्ष्य लिइएको छ।

स्रोतका अनुसार चालु वर्षका लागि यही कार्यविधिअनुसार परीक्षा सञ्चालनदेखि नतिजा प्रकाशनसम्मको काम अघि बढाइने तयारी भइरहेको छ। यसले एसईई नतिजा छिटो सार्वजनिक गर्ने सरकारको लक्ष्यलाई सहयोग गर्ने विश्वास गरिएको छ।

यससँगै आगामी वर्षदेखि एसईई परीक्षा व्यवस्थापनको जिम्मा प्रदेश सरकार वा विद्यालयलाई दिने विषयमा पनि छलफल सुरु भएको छ। यसका लागि आवश्यक कानुनी व्यवस्था गर्ने विषयमा सरकारभित्र बहस भइरहेको छ।

यस योजनालाई परीक्षा प्रणालीलाई आधुनिक, छिटो र प्रभावकारी बनाउने महत्वपूर्ण कदमका रूपमा हेरिएको छ।

डिजिटल सरोकारको एप्लिकेसन डाउनलोड गर्न यहाँ क्लिक गर्नुहोस् । अब बन्छ तपाईँको लाइफ सजिलो अनि छरितो।