आन्तरिक राजस्व विभागले नगद भुक्तानी गरी सामान खरिद गर्ने उपभोक्ताहरूलाई लक्षित गर्दै 'करदाता प्रोत्साहन उपहार कार्यक्रम' मा सहभागी हुनका लागि आधिकारिक पोर्टल सञ्चालनमा ल्याएको छ । विभागले prize.ird.gov.np पोर्टल सार्वजनिक गर्दै नगदमा कारोबार गर्ने उपभोक्ताहरूलाई आफ्ना खरिद बीजक (बिल) हरू प्रणालीमा प्रविष्ट गर्न आह्वान गरेको हो ।
बजारमा वस्तु तथा सेवा खरिद गर्दा बिल लिने-दिने संस्कृतिको विकास गर्न र व्यापारिक कारोबारलाई पारदर्शी बनाउन विभागले यो डिजिटल प्लेटफर्म तयार पारेको हो । यस पोर्टलको प्रयोग गरी उपभोक्ताले आफूले सामान किन्दा तिरेको बिलका आधारमा उपहार कार्यक्रममा आफ्नो दाबी सुरक्षित गर्न सक्नेछन् ।
विभागका अनुसार स्व-प्रयोजनका लागि नेपालभित्र एक पटकमा १०० रुपैयाँभन्दा बढीको सामान वा सेवा खरिद गरी नगद भुक्तानी गर्ने उपभोक्ताहरू यसका लागि योग्य हुनेछन् । सहभागी हुन चाहनेले १ साउन २०८३ पछिका आफ्ना खरिद बीजकको विवरण विभागको पोर्टलमा गई तोकिएको समयभित्रै दर्ता गराउनुपर्नेछ । नगद कारोबारको हकमा प्रणालीमा विवरण नभर्ने उपभोक्ताहरू उपहार कार्यक्रममा समावेश हुन पाउने छैनन् ।
नगद भुक्तानी गर्नेले अनिवार्य रूपमा पोर्टलमा विवरण भर्नुपर्ने भए तापनि डिजिटल माध्यमबाट भुक्तानी गर्नेहरूका लागि भने विभागले विशेष व्यवस्था गरेको छ । भुक्तानी सेवा प्रदायक (मोबाइल बैंकिङ, क्यूआर कोड, कार्ड आदि) मार्फत विद्युतीय भुक्तानी गरी १ साउनपछि खरिद गरिएका बिलहरूको विवरण प्रणालीमा स्वतः समावेश हुनेछ । यस्ता उपभोक्ताहरूले पोर्टलमा गइ छुट्टै विवरण प्रविष्ट गरिरहनु पर्ने छैन ।
वस्तु तथा सेवा खरिद गर्दा अनिवार्य रूपमा बीजक लिन उत्प्रेरित गर्ने र वास्तविक कारोबारको अभिलेखीकरणलाई प्रोत्साहन गर्ने विभागको मुख्य उद्देश्य रहेको छ । यो कार्यक्रमले कर अनुपालनमा वृद्धि गर्ने र उपभोक्तालाई राज्यको कर प्रणालीमा प्रत्यक्ष रूपमा जोड्न मद्दत पुग्ने सरकारको विश्वास छ ।
आन्तरिक राजस्व विभागले सम्पूर्ण उपभोक्ताहरूलाई आफूले सामान किन्दा अनिवार्य बिल लिन र नगद भुक्तानीको हकमा विभागले ल्याएको नयाँ पोर्टलमा समयमै विवरण दर्ता गरी उपहार कार्यक्रमको लाभ लिन अनुरोध गरेको छ ।
0 Comments